BlixBlog

Det største Under her paa Jord / Er Jesu Kristi Rike.
Det eig ein Herlegdom so stor, / Som reint er utan like.
----------------------
Elias Blix, Nokre Salmar (4de aukade Utgaava; Kristiania: Samlaget, 1891), nr. 87

Grundtvig-salmen "Vidunderligst af Alt paa Jord" gjendikta Blix til 1883-utgåva av Nokre Salmar.

Blix har mykje felles med Grundtvig i biletbruken. Her er mykje lys og vekst, natur og årstider. Og ikkje minst: Begge kan sin bibel godt. Blix følgjer Grundtvig nokså tett i denne salmen. Du skal få ein liten katalog over opplagte bibelske referansar i dag også:

• Strofe 2: "Det Byen er paa Bergetind" - Matteus 5,14
  
• Strofe 3: "eit Løyndarord, Som skaper, naar det talar" - Salme 33,9
  
• Strofe 3: "Som jamnar Haugar ut paa Jord Og fyller djupe Dalar" - Jesaja 40,4
  
• Strofe 6: "Det skaper Vatnet um til Vin" - Johannes 2,1-11
  
• Strofe 6: "Det som eit Ljos i Myrkret skin" - Johannes 1,5
  
• Strofe 9: "Det, som me her i Spegel sjaa, Me kjenna daa til Grunnen" - 1. Korintarbrev 13,12

Lat meg også peike på eit par karakteristiske Blix-grep i gjendiktinga.

• Strofe 6: "Det skaper Vatnet um til Vin Og Villmark til Guds Hagar," for Grundtvigs "Med det der skabes Viin af Vand, Og Paradis af Ørke"
  
• Strofe 10: Med "Daa held Guds Rike Jubelaar Med Rett og Fred og Fagnad," for Grundtvigs "I Evighedens Gylden-Aar, Med Ret og Fred og Glæde," gjer Blix den bibelske bakgrunnen tydelegare (3. Mosebok 25, "jubelåret" frå eldre bibeltradisjon heiter no "frigjevingsåret").

Heile salmen.
Kjelde for bibelteksten: Bibelen.no
Tidlegare kommentar.
Gårsdagens Blix.